RTF Ossingen, 20.-22. Juni 2014

Nach wuchelangem Üebe isch’s am Fritig, 20. Juni, denn endlich sowiet gsi. Meh oder weniger pünktlich hemer eus am 20 vor 3 bim Migros z’Chliandelfinge troffe und sind vo det us zemme uf Ossinge gradlet. Heiss hemmer eigentlich scho gah, womer ahcho sind, aber s’Ufwärme isch, nachdem mer rasch d’Täschene bim Plätzli deponiert hend, grad wietergange. Glücklicherwies het d’Dorine ja neuerdings immer villi kreativi Idee, so au dasmal. Hemmer doch mit em McDondald’s Spieli bald als Eistee, Cheese-Burger, Pommes, Big Mac und Chicken-Nuggets ahgfange Kalorie verbrenne. Viel ahbrenne lah hemmer au nacher nöd, sondern sind grad zu de Gymnastik übergange. Mer sölled eus meh id Musig iehfühle (es so fühle, wie d’Arlene das macht), gross turne, au zeige, dass eus s’Tanze Freud macht, aber glichzitig jaa nid z’vill lache, well sust de Usdruck doch nüme stimme würd. All das und was mer ih de Training vo de vergangene Wuchene sust no so z’ghöre becho hend, hemmer eus nomal bewusst gmacht. Und nach es paar letschte Durchgäng, ehre letschte Cherze, ehre letschte Rückwärtsrolle, het au die nervösi Nina gfunde, dass mer etz parat sind zum eus zeige und s’dene z’zeige. Dank em usbliebende Regeschauer het’s denn au gnueg Zueschauer gha, wo scho ganz gspanne gsi sind uf eusi neui Gymnastik. Mindestens genauso gspanne hend denn au mir eus währed dem Tanze, sodass es schlussendlich uf es 8.88 glanget het. Wobi sich es paar ganz (oder ehner halb?) schlaui Fans sicher gsi sind, dass es bestimmt für meh glanget het, wemer no eh chli meh als bloss de Umhang abzoge hetted…   Nachere chliine Pause isches denn wiedr witergange mit em ihlaufe fürd LA. Und mir sind doch promt ine Sackgasse iegrännt denn hemmer halt wieder müse umchehre. Die vom Schlüderball hend chli früener müse los gah. Agfange het, hmm… wie spricht me das etz us: Arlene oder Arline? Ja denk Arline, was susch? Wiiter debii sind gsi: Katja, Karin, Heidi, Susanne Wegmann, Susanne Möckli, Anita Meister und  Anita Möckli. Immer die Dopplete Näme! Unterstützt simmer worde vo de dritte Anita und de Maja, d Andrea und d Corinne sind denn au no cho luege. Bim schlüdere hemmer en Schnitt vo ungefähr 30 übercho, de besti isch 36 gsi. Womer fertig gsi sind hend doch no zwei d Stäbli entdeckt. Das het sofort müse usprobiert werde. Wer chunnt echt wiiter d Heidi oder d Susanne? Au bi de Pendelstafette simer chräftigt unterstützt worde, vo wem jetzt gnau wüssemer zwar nöd, aber das spielt ja au ke Rolle. Sie hend amigs nu churz de Name vo de nächste Läuferin welle ghöre…und jaa, nacher het mer nur no sie ghört… Viel Zit zum die vorteilhafte Föteli wo d’Laura vo de Sprintende gmacht het ahzluege, hemer aber nöd gha, schliesslich hemer eus denn au scho bald wieder für de Schuelstufebarre mösse parat mache. S’isch offebar nöd nur für eus de letschti  Ihsatz gsi, sondern au für d’Kampfrichter. Doch we seit mer so schön? S’Beschte chunt numal zum Schluss. Also hemer eus nomal jedes einzelne 1x8 dur de Chopfgah lah und sind denn uf em Barre fast so abgange wie am Bruno Mars sini Granate, sodass eus d’Zueschauer ihri Begeisterig mit vill Applaus und d’Kampfrichter mit mne 9.45 zeigt. Uf die super Leistige het natürlich mösse ahgstosse werde und so hend die „Uusdiente“ de „Verdiente“ denn nebd me feine Speckzopf au no Volgaz spendiert, bevor mer eus alli zemme uf de Weg is Festzelt gmacht hend. Bemerkenswert isch det vilicht no gsi, dass währed mir no bi eusem Riz Casimir und me Gläsli Wysse bliebe sind, de Fraueturnverein scho längst uf de Bänk gstande isch (und da wagts de netti Herr vom Landbot tatsächlich z’behaupte, so es Turnfest seg nüt „hochstehends“..?). Doch natürlich hend au mir eus s’Fäste nöd lah näh und das trotz de miserable Schwiizer Fussballnati (und em verräterische Verhalte vo de Nicole H.)… …s’Fäste isch denn am Samstig au grad wietergange, nachdem mer alli Helferihsätz für euse Göttiverein gleistet und de Flugshow vom PC-7 Team zuegluegt hend. Well s’Turnfest zitlich aber nid soo guet glege isch, hend es paar ahgehendi „Akademiker“ scho vill z’früeh hei mösse. Well’s örtlich jedoch umso besser glege isch, hend alli andere de Abig und d’Nacht au umso meh chöne gnüsse… Nichtsdestotrotz het sich denn am Sunntigmorge am 11.30 doch no es Grüppli igfunde zum d’Rangverkündigung go luege. Zerst simmer aber no eis go trinke und es hend sich denn namal es paar zu eus gsellt. Agfange hett d’Rangverkündigung mitem Fahnelauf und em Turnerlied, agstimmt vom TV Ossinge. Zwüschet de Bekanntgab vo de drü beste Resultat pro Kategorie hets na freii Vorfüerige geh, under anderem au vom Gastverein us Östrich. Nach de Rangverkündigung isch me chli in Schatte ghöcklet und het namal öppis trunke. Bald het sichs Grüppli aber ufglöst und die erste sind wiedr hei gange. Schliesslich het mer sich no chli mösse usruebe zum für s’Wucheend druf wieder fit z‘si, sodass mer det denn hoffentlich genauso gueti Leistige wird chöne zeige. Mit em hervorragende 6. Rang vo 29 ih de zweite Stärkeklass, womer ah dem Wucheend z’Ossinge erreicht hend, derfemer nämlich würklich meh als zfriede sii. Also bis glii, z’Roggwil!